Ikusle taldea

Irudiak dena hartu du aspaldian: dena da irudia, eta denean dago. Ikusizko Orden Berrian bizi gara arte teoriko batzuen ustez. Ezin da ukatu irudiz gainezka daudela gure eguneroko bizitzak, eta irudi bitartez komunikatzen garela geroz eta gehiago. Irudian bizi gara eta irudiak bizi gaitu.

Ezingo genuke ulertu XXI. mendea irudiaren hedatzea gabe. Argazki (eta bideo) kamera bana daramagu aldean, eta argazkiz beteta daude gure telefono (ez hain) inteligenteak. Argazkiak jada ez dira albumetan gordetzen, telefonoen memorian galtzen dira…

Paradoxa dirudi, baina gaur inoiz baino beharrezkoagoa (eta zailagoa) da irudi bat sortzea, eta zer esanik ez iruditeria bat sortzea. Garai eta leku bateko jendeari zer edo zer esango diguten irudiak sortzea da zaila, eta horregatik beharrezkoa. Irudiaren gainean hausnartzea ezinbesteko bihurtu zaigun bezala. 

Irudia tresna potentea da, izugarri indartsua, eta irudiaren ahalaz gogoeta egitea tokatzen zaigu, baina baita irudiaren azalaz ere: nola egiten da irudi bat, nola eraikitzen, nola irakurtzen, zer ikusten dugu hor, nola ikusten gaitu irudiak… Eta nola jartzen dira irudiak zirkulazioan, non galtzen dira, non pausatzen, nola eusten diote denboraren joanari, nora joaten dira inork ikusten ez dituenean…

Bi gauza diferente dira begiratzea eta ikustea. Batzuetan ez diegu begiratu ere egiten irudiei, besteetan begiratu gabe ere ikusi egiten ditugu. Eta mutur batetik besterako tarte hori da guk lana egiteko lekua. Eta irudiek ze funtzio betetzen duten pentsatzekoa.

Irudiak dena hartu du aspaldian: dena da irudia, eta denean dago. Irudiak sortzea inoiz baino errazagoa da, auskalo zenbat egiten ditugun egunero, ohartu gabe; prozesua azkarra da, automatikoa kasik. Dinamoko irudiaren eremua automatismo hori deseraikitzeko lekua da, eraikiz deseraikitzeko, prozesua aztertzeko, moteltzeko, geldotzeko, gelditzeraino. Irudiaren barrunbeetan arakatzeko, hankaz gora jartzeko, mundua bere horretan emango duten irudiak baino irudia bere horretan emango duen mundu bat egiteko.

Horretarako antolatu dugu Ikusle Taldea. Edozein eratako irudien gainean hitz egitea da asmoa: artelanak, argazkiak, iragarkiak, aldizkari edo liburuen azalak, afixak, filma zatiak, memeak, GIFak… Irudiei buruz hitz egitea da kontua, eta irudia pentsatzea.

Irekia da, nahi duenak dauka etortzea; ez dago izena eman beharrik, baina dena eman behar da. Hilean behin bilduko gara Dinamoan, azken asteartearekin, irailean hasita.

· Lehen hitzordua irailaren 29an, 19:00etan, begiak ongi irekita.
· Bigarren hitzordua urriaren 27an, 19:00etan, begiak zabal-zabalik.