Apokalipsia (1965)

apokalipsia

 

    ETA HONA HEMEN

    aingeru bat ikusi nuen

                          (bere zelula guztiak begi elektronikoak ziren)

eta ahots supersoniko bat entzun nuen

eta esan zidan: ireki idazmakina eta idatzi

                eta ikusi nuen hegan zihoan jaurtigai zilarkara bat

           eta Europatik Ameriketara 20 minutuan iritsi zen

eta jaurtigaiaren izena H Bonba zen

                        (eta berekin zeraman infernua)

        eta ikusi nuen zerutik erortzen plater hegalari bat

eta sismografoek lurrikara handitzat jaso zuten

eta lurraren gainera erori ziren planeta artifizial guztiak

            eta Erradiazioaren Kontseilu Nazionaleko Lehendakaria

            Energia Atomikoaren Batzordeko Zuzendaria

            Defentsa Idazkaria

                      denak euren kobazuloetan sartuta zeuden

eta lehen aingeruak alarmaren sirena jo zuen

                eta goitik behera hasi zuen Estronsium 90

                                            Cesium 137

                                            Ikatza 14

eta bigarren aingeruak sirena jo zuen

eta tinpano guztiak lehertu ziren 300 miliako eremuan

leherketaren zaratagatik

eta leherketaren argia ikusi zuten erretina guztiak erre ziren

300 miliako eremuan

            eta erdian beroa eguzkiarenaren antzekoa zen

eta altzairua burdina beira porlana lurrundu egin ziren

            eta euri erradioaktibo bilakatuta erori ziren

eta haize hurakanatua sortu zen Flora Hurakanaren indarrekoa

eta 3 milioi auto eta kamioi hegan joan ziren airean

eta eraikinen kontra lehertu ziren

                                  Molotov koktelak bezala

eta hirugarren aingeruak alarmaren sirena jo zuen

eta ikusi nuen New York gainean onddo bat

                                            eta Mosku gainean onddo bat

               eta Londres gainean onddo bat

                                               eta Pekin gainean onddo bat

(eta inbidia ematen zuen Hiroshimaren zorteak)

Eta denda guztiak eta museo eta liburutegi guztiak

eta munduko edertasun guztiak

                                  lurrundu egin ziren

eta partikula erradioaktibozko lainoaren parte bihurtu ziren

planetaren gainean zegoena hura pozoituz

       eta euri erradioaktiboak batzuei leuzemia sortzen zien

                             eta beste batzuei biriketako minbizia

          eta hezurretako minbizia

                                      eta obarioetako minbizia

eta haurrak begietan kataratak zituztela jaiotzen ziren

eta geneak kaltetuta geratu ziren 22 belaunalditarako

-eta horri 45 Minutuko Gerra deitu zitzaion-

     7 aingeruk

kez betetako kopak zeramatzaten eskuetan

                         (eta onddo formako kea zen)

eta ikusi nuen lehenbizi Hiroshima gainean jasoa eta kopatzarra

              (kremazko edo ice-cream pozoituzko kopa bat bezala)

              eta ultzera gaizto bat sortu zen bat-batean

eta bigarrenak itsasora hustu zuen bere kopa

     eta itsasoa erradioaktibo bihurtu zen

                                          eta arrain guztiak hil ziren

eta hirugarrenak neutroi kopa bat hustu zuen

eta gizakiak kiskali zituen eguzkiarena bezalako su batekin

eta laugarrenak bere kopa hustu zuen kobaltozkoa

eta Babiloniak haserrearen kaliza edan zuen

eta ahotsak oihu egin zuen: berak eman duen megatoien bikoitza eman horri!

eta bonba horren botoia zeukan aingeruak

                                           sakatu egin zion

Eta esan zidaten: eta hori oraindik ez duzula ikusi Tifu Bonba

                eta Q Sukarra

Ene gaueko ikuspenarekin jarraitzen nuen

Eta ikusi nuen ene ikuspenean telebista batean bezala

ateratzen zela masetatik

                         Makina bat

             izugarriki izugarria guztiz

eta hartza ematen zuen edo arranoa edo lehoia hegazkin hegalekin eta

helize askorekin eta antenaz betea zegoen eta bere begiak radarrak ziren

eta bere garuna konputagailua Piztiaren zenbakia kalkulatzen zuena

eta orro zegien mikrofono askotatik

                   eta aginduak ematen zizkien gizakiei

eta gizakiek izua zioten Makinari

Era berean ikusi nituen ikuspenean hegazkinak

soinua baino azkarragoak ziren hegazkinak 50 megatoiko bonbekin

eta ezein pilotok ez zituen gidatzen eta soilik Makinak kontrolatzen zituen

eta munduko hiri guztietara bidean egin zuten hegan

eta guztiek asmatu zuten bete-betean

eta esan zuen aingeruak: antzematen duzu non zegoen Columbus Circle?

         Eta non zegoen Nazio Batuen eraikina?

Eta Columbus Circle egon zen lekuan

       nik 50 solairuko eraikin bat sartzeko moduko zuloa besterik ez nuen ikusi

eta Nazio Batuen eraikina egon zen lekuan

nik goroldioz eta ahate zirinez betetako labar gris bat besterik ez nuen ikusi

eta haratago aparrez inguratutako haitzak eta kaioak oihuka

eta zeruan argi handi bat ikusi nuen

                 milioi bat megatoiren leherketa bezalakoa

eta ahots bat entzun nuen esan zidana: piztu irratia

eta piztu nuen eta aditu: BABILONIA ERORI DA

                                             ERORI DA BABILONIA HANDIA

eta munduko irrati guztiek albiste bera ematen zuten

eta aingeruak txeke bat eman zidan National City Bankekoa

eta esan zidan: aldatu txeke hori

eta inon ezin izan nuen aldatu banku guztiek behea jo baitzuten

Etxe orratzak sekula izan ez balira bezala zen

Milioi bat sute piztu zen batera eta ez zegoen suhiltzaile bat bera

eta ez zegoen telefonorik anbulantziari deitzeko eta ez zegoen anbulantziarik

eta hiri bakar bateko zaurituentzat ez zegoen nahikoa odol-plasma mundu guztian

eta beste ahots bat entzun nuen zerutik:

                                            Irten hortik ene herria

ez zaitzan kutsa Erradioaktibitateak

                                eta ez zaitzaten harrapa Mikrobioek

       Antrax Bonbak

                         Kolera Bonbak

       Difteria Bonbak

                        Tularemia Bonbak

Telebistan ikusiko dute hondamendi handia

                Babiloniari jada erori baitzaio Bonba

eta esango dute: Ai Ai Ai Ai Hiri Maitea

pilotoek hegazkinetatik ikusiko dute eta hurbiltzeko beldur izango dira

trasatlantikoak urrun geratuko dira aingura botata

euren gain lepra atomikoa erortzeko beldurrez

Eta soinu uhin guztietan ahots bat entzuten zen esaten zuena:

               ALELUYA

Eta aingeruak basamortura eraman ninduen

            eta basamortua laborategiz loratuta zegoen

eta han Deabruak bere proba atomikoak egiten zituen

eta ikusi nuen Prostituta Handia Piztiaren gainean eserita

(Piztia teknologikoa zen Piztia dena Esloganes betea)

eta Prostitutak mota guztietako txekeak, bonuak eta akzioak zituen

eta merkataritza-dokumentuak

eta mozkortuta zegoen eta bere puta ahotsarekin kantatzen zuen night-club batean bezala

eta ezkerreko eskuan odol-kopa bat zeukan

eta mozkortu egiten zen berak purgatutako guztien odolarekin

eta Gerra Kontseiluetan torturatu eta kondenatu guztienarekin

eta paredoira bidalitako guztienarekin

eta munduko opositore guztienarekin

                     eta Jesusen martiri guztienarekin

eta barre egiten zuen bere urrezko hortzekin

              eta bere ezpainetako lipsticka odola zen

eta aingeruak esan zidan: Piztiari ikusten dizkiozun buruak diktadoreak dira

eta adarrak oraindik diktadore ez diren lider iraultzaileak

baina gero izango dira

eta Bildotsaren aurka borrokatuko dira

                   eta Bildotsak garaitu egingo ditu

Esan zidan: munduko nazioak 2 bloketan zatituta daude

                                            -Gog eta Magog-

baina 2 blokeak bakarra dira berez

(Bildotsaren aurka dagoena)

                   eta sua eroriko da zerutik eta irentsi egingo ditu

Eta ikusi nuen Lurraren biologian Eboluzio berri bat

Espazioan Planeta Berria sortu balitz bezala zen

Heriotza eta infernua su nuklearraren itsasora jaurtiak izan ziren

masak ez ziren gehiago esistitzen

eta Eboluzioak sortutako espezie berri bat ikusi nuen

espeziea ez zegoen norbanakoz osatua

baizik eta organismo bakarra zen

                      gizakiz osatua zelulaz beharrean

eta biologo guztiak harrituta zeuden

Baina gizakiak libre ziren eta gizakien batasun hori Pertsona bat zen

                                      -eta ez Makina bat-

eta soziologoak harrituta zeuden

eta espezie honen parte izan ez ziren gizakiak

                                   fosil bilakatu ziren

eta Organismoak planetaren biribiltasun guztia estaltzen zuen

eta biribila zen zelula bat bezala (baina bere dimentsioak planetarenak ziren)

eta Zelula apaindua zegoen Emaztea Senarraren zain bezala

eta Lurra festarako zegoen

             (lehen zelulak bere Eztei-Festa ospatu zuenean bezala)

eta Kantika Berria zegoen

eta beste planeta habitatu guztiek Lurra entzun zuten kantuan

            eta maitasun kantua zen

Egilea
Ernesto Cardenal

Alea
1 | Apokalipsia